Mange vil kalla det galskap. Ja, både å kryssa Grønland som 14-åring, men ikkje minst å gå åleine til Sørpolen når du er 21 år. Karen Kyllesø frå Årdal i Ryfylke har nå verdsrekorden i å vera den yngste som har gått åleine til Sørpolen. Var ho redd undervegs? Absolutt. Ikkje minst då det var dårleg føre og motbør i starten. Då måtte ho rekna om både på tal kilometer til dagen og kor mykje mat ho kunne eta. Høyr den eventyrlege historia i podcasten På Ekta.
– Kven er største polfararen av Roald Amundsen og Karen Kyllesø, lurer Tor Øyvind Skeiseid på i intervjuet.
– Amundsen. Han var først, svarar Karen Kyllesø kontant.
– Men, han hadde fleire med seg. Du var åleine, påpeikar Tor Øyvind tilbake, men får ikkje Karen til å bruka større ord om seg sjølv.
For Karen Kyllesø er opptatt av å følgja draumane sine og kjenna på meistring. Og nettopp det vil ho inspirera andre til å gjera, utan at dei må plent må gå til Sørpolen for å oppleva meistringskjensle.
13. januar i år kom altså Karen Kyllesø fram til Sørpolen, etter 54 døgn åleine på ski i Antarktis. Ho hadde mål om 50 dagar og mat for 55 dagar. Det måtte justeringar til undervegs, og du får høyra frå Karen si utruleg reise i den nyaste utgåva av Ryfylkealliansen sin podcast. Reisa starta då Karen var tre år, og ho kjende meistringsglede av å vera med far Håkon på fisketur. Etter den tid har ho stort sett tatt nye steg utandørs. Eit døme er ein Grønlandstur i niande klasse, som gjorde at ho måtte ta ein forseinka konfirmasjonsfest. Og deretter blei det seks år med planlegging for å gå åleine i Antarktis.
Bli kjent med drøymaren og eventyraren Karen Kyllesø, og høyr om frykt, spenning, glede, uro, tomheit, pågangsmot og rasjonelle vurderingar. Men, om ho vil oppmoda eventuelle eigne ungar til å gå til Sørpolen åleine? Det spørs.
Podcasten På Ekta høyrer du på Spotify og andre kanalar – sjå meir her: Podcasten: På Ekta – Ekta historier frå Ryfylke – ryfylkealliansen.no
Foto: Privat
Foto: Privat
