Heftig i Lysebotn

aug 3, 2021 | Framside, Nyhende, Ryfylkealliansen

Hovudfoto: Strandbuen

Han fekk sommarskuta til å leggja om kursen, og må tenkja kohort både ein og to og tre gonger. Odd Langhelle gler seg til nok ein BLINK-festival, sjølv i pandemitider. På torsdag smell startskotet i Ryfylkeperla Lysebotn.

– Det ser ut til at veret skal bli sånn nokon lunde greitt. Det er vel andre element me er meir spente på. Men, Lysebotn Opp har me relativt god kontroll på, smiler BLINK-general Odd Langhelle.

Han har årevis av arrangementserfaring. Han har sett Sandnes og Lysebotn solid på kartet. Han veit at NRK si mest sende TV-sending om sommaren er fire dagar med BLINK-arrangement. Verdas fremste langrenns- og skiskyttarutøvarar testar formen på asfalt. Covid-19-situasjonen gjera at folkefesten i Sandnes sentrum fredag og laurdag går ut, for andre året på rad. Men, i Melsheia i Sandnes, finn du Sandnes Sparebank Arena, ei fem kilometer lang rulleskiløype, som i år blir omkransa med publikum.
– Me vil jo det skal vera rift om plassane, men me vil heller ikkje ha kaos, erkjenner Odd Langhelle.
Det blir idrettstevlingar heile dagen og ut over kvelden, og gratiskonsertar med Morten Abel fredag og Postgirobygget laurdag.
– Og det er grøne koronapass og kohortar her og der. På kort tid skal strafferundar gjerast om til konsertarena og kohortane skal ikkje kryssast. Men, det skal gå, lovar Odd Langhelle.

Foto: Stavanger Aftenblad

Lysebotn ein vinnar
Då er det lettare med motbakkerennet sør i Ryfylke. Torsdag er den store testen for utøvarane. Opp, opp, opp, sving, sving, sving – 27 hårnålssvingar frå Lysebotn og opp til Øygardsstølen.
– Her kan folk stå spreidd langs heile ruta, med avstand. Så det skal gå fint. Og ja, det blir eige løp også i år for dei som skal staka seg rett opp også. Heftige saker, humrar BLINK-sjefen.
Skikanonane frå mange nasjonar stiller. Heldigvis har ein fått same innreisereglar for utanlandske utøvarar, som til dømes Bislett Games fekk i juni. Ingen karantene.
– Det er vel ikkje overraskande om det blir norske sigrar. Både Therese Johaug og Simen Hegstad Krüger stiller også i år, seier ein nøgd Odd Langhelle.
Lynutøvar Hegstad Krüger har vunne dei tre siste åra, men det er Hans Christer Holund som har rekorden på vel 27 og eit halvt minutt.
Therese Johaug sin rekord er like over 31 minutt, og ho er då også mestvinnande kvinne, med fem sigrar.

Sommarbåt og sommarstemning
Odd Langhelle er ein erfaren og målretta arrangør. Gang etter gang, år etter år, er det BLINK, Lysebotn og ikkje minst Sandnes som pregar sportsbiletet i august.
– Samtidig må me tenkja nytt. Folk vil ha noko spektakulært også. Det får dei ved konkurransane og med konsertane. Men, også andre happeningar, forklarer Langhelle.

Foto: Landevei.no

Så kva gjer ein då når det ligg ein 42 kilometer verdskjend fjord i nærleiken? Jo, ein får NRK til å endra sendeplanar. Sommarskuta «Statsraad Lemkuhl» tapetserer sendetid på NRK1 og NRK2 om dagane. Planen var at skuta skulle ta vegen frå Kopervik og til Sirevåg i starten av august. Då Odd Langhelle såg sendeplanen, var han ikkje sein om å ringja til dei som hadde noko med turen å gjera.
– Eg fekk omdirigert skuta inn Lysebotn 5. august. Ja, det er jo fantastiske bilete, når me koplar Lysebotn Opp med Statsraad Lemkuhl inn Lysefjorden. NRK forstod den, humrar Odd Langhelle, og ser fram til både ei vakker skute og verdsutøvarar på same rekkje.

God BLINK!

Arkiv

Relaterte innlegg

Merkevareprisen 2021 til Helgøy Skyssbåt AS

Merkevareprisen 2021 til Helgøy Skyssbåt AS

Ryfylkealliansen deler kvart år ut Merkevareprisen Ryfylke til ei verksemd som har utmerka seg ved å bidra til å løfta Ryfylke opp og fram. Prisen blei delt ut på Arena Ryfylke på Hjelmeland. For 14. gong blir Merkevareprisen Ryfylke delt ut. Merkevareprisen skal gå...

Verdsklasse i Hjelmeland

Verdsklasse i Hjelmeland

Episode fire av Ryfylkepuls er på lufta. Bli med til Hjelmeland der ein med rette kan skryta på seg å vera i toppen i verda. Røykelaks, sider og jærstol – best og størst. Og verdas første hydrogenferje går nettopp i Hjelmelandssambandet. Nå blir det også satsa på...

Pilt-Ola prisen 2021 til Gunvor Fiskå

Pilt-Ola prisen 2021 til Gunvor Fiskå

Ho er samfunnsengasjert, og har alltid vore oppteken av å få ungdom i arbeid og brenn for faget sitt. Gunvor Fiskå frå Jørpeland er tildelt den gjeve Ryfylke-utmerkinga Pilt-Ola prisen. Fylkesordførar Marianne Chesak delte ut prisen under Arena Ryfylke på Hjelmeland...

Pin It on Pinterest

Share This