Jørpeland er «hot»

sep 11, 2020 | Framside, Nyhende, Ryfylkealliansen

Folk strøymde til Jørpeland i sommar. Ein god del tok turen vidare til Preikestolen. Og fleire har handla fritidsbustad utan særleg tenketid.

Det blei ikkje eit Ryfastblaff. Då Ryfylketunnelen opna 30. desember i fjor, fekk ytre Ryfylke generelt og Jørpeland spesielt invasjon av gjestar frå Rogaland. Så kom koronastoppen. Mange venta nedgang. Mars til mai var tunge. Men:
– Det blei ein sommar med mykje besøk, fastslår ein nøgd sentrumsleiar Elin Aasheim Rossemyr på Jørpeland.
– Hyttegjestane har vore meir på hytta enn elles og brukt kommunen. Det er utruleg bra. I tillegg ser me at folk frå Stavangerområdet går turar i fjella rundt Jørpeland. Og så bruker dei byen etter fjellturen, seier sentrumssjefen.
Naturleg nok er det litt ulike opplevingar frå butikk til butikk i Ryfylkebyen.
– Men, dei fleste butikkane har opplevd ein auke i omsetnaden, forklarer Elin Aasheim Rossemyr.

Helge Kjellevold er leiar for Lysefjorden Utvikling, og kan skilta med gode Preikestolen-tal, ut frå faktumet at den utanlandske marknaden meir eller mindre forsvann. Teljeapparatet viser 163 057 personar som har gått til Preikestolen dei første åtte månadene av året.
– Det er 120 000 færre enn for same tid i fjor. Men, det er slettes ikkje gale. Spesielt i juli var det mange som gjekk til Preikestolen også i år, fortel Kjellevold.

Ei som opplever pågangen av stavangerfolk i Ryfylke, er dagleg leiar Marion Espedal i Aktiv Eiendomsmegling Ryfylke.
– Jøsses ja. Me merkar det aller best på fritidsmarknaden. Eg trur me kan takka korona og Ryfast for at alle vil ha hytte i Ryfylke. Og dei skal ha hytta brennkvikt. Nå ligg tomtene og hyttene ute kort tid, og salet er i alle fall dobla i forhold til same periode i fjor, røper ho.
– Det er rett og slett ein fryd. Stader som Idse og Kvalvåg, ikkje langt frå Jørpeland, er mest populære. Men, me merkar trøkket i heile Ryfylke. Og det går også raskare å selja bustader enn før. Det er ikkje same tempoet som på fritidsmarknaden. Men, det er absolutt kjekt for tida, smiler Marion Espedal.

Ryfasteffekten har foregreina seg til heile Ryfylke, også dei indre delane som Sauda og Suldal. Det gjer at Aktiv Eiendomsmegling Ryfylke nå etablerer eige salskontor i Sauda.
– Folk i Indre Ryfylke fortener å nyta godt av dei høva som ligg i eit fast meklarkontor, understrekar Marion Espedal.

Arkiv

Relaterte innlegg

Ungdom i Ryfylke får gratis ungdomskort frå 1.april

Ungdom i Ryfylke får gratis ungdomskort frå 1.april

Ryfylkepuls har tatt pulsen blant Ryfylkeungdomen – kva synes dei om ordninga med gratis ungdomskort som snart skal tre i kraft? Vil det gjera at dei reiser meir? Er dette eit godt lokkemiddel for å få ungdom til å bu og studera i Ryfylke? Ein av dei me tok ein prat...

Søknadsfristen nærmar seg!

Søknadsfristen nærmar seg!

1.mars er fristen for å søkja om plass ved dei vidaregåande skulane, og i Ryfylke har me to av desse.  Strand vgs er ein skule som ligg sentralt på Tau i Strand kommune. Med visjonen "Det beste i den enkelte" er tilsette ved Strand vgs opptatt av og bevisste på å sjå...

Spring for livet

Spring for livet

Ho er alltid på farten. Tidleg og seint. Søvn er det lite av. Men, kilometrane er mange. Over 8 000 kilometer på eit år. Bli kjent med Therese Nordbø, ein energibunt av det sjeldne som spring verda rundt for at andre kan få det litt betre.   Gjer deg klar for...

Pin It on Pinterest

Share This