Ja, det er overskrifta når me inviterer til den årlege storsamlinga Arena Ryfylke onsdag 9. november. Denne gongen på Jelsa i Suldal kommune.
Fokus er på nærings- og bustadattraktivitet i Ryfylke, og programmet er både omfattande, variert, spennande og artig. Det er Ryfylke IKS, Ryfylkealliansen, Næringsforeningen i Stavanger-regionen og Suldal Vekst som inviterer, i samarbeid med Sparebanken Vest.
Få med deg idyllen Jelsa, unge stemmer, skaparånd, skråblikk, analysar, Norsk Stein, prosjektplanar og meiningar kring Wind Works Jelsa, Pilt-Ola pris, Ryfylkepuls, næringssatsing, tettstadutvikling, Jelsa hotell, ryfylkemat av beste kvalitet … og kanskje kjem Jelsa-presten. Med andre ord ein innhaldsrik langdag på Jelsa, staden som er kåra til Rogalands flottaste og mest idylliske plass.
Med knappe 250 personar kjenner jelsabuen på kroppen både moglegheiter og utfordringar innan storindustri, innflytting, fråflytting, hotellsatsing og litt for få ungar på oppvekstsenteret.
Jelsa er i så måte ein god representant for det Ryfylke me set fokus på den 9. november.
