Det Norske Måltid (DNM) leitar kvart år etter det ypparste innan norsk mat og drikke, og har etablert seg som ein av matbransjens viktigaste og mest prestisjefulle prisutdelingar.
Dette året er tre produsentar frå Ryfylke med i finalen.
Helgøyfrukt sine morellar er med i kategorien Årets grøne.
Morellane blir produserte på garden til Gøril og Geirmund Helgøy. Garden ligg på Helgøy i Ryfylke, der dei har dyrka morellar sidan 1911. – Me kjenner på ei stor takksemd fordi våre produkt blir så godt tatt i mot av alle kundar, seier Gøril. Ho gler seg til neste morellsesong når det er fastlandssamband med bru til Helgøy. – Brua vil gjera det enklare for kundane å få tak i dei etterspurde morellane, trur Gøril Helgøy. Gøril og Geirmund tok over fruktgarden i 2011. No dyrkar dei morellar under tak og årleg haustar dei 12 tonn.
Fjellam Frå Ryfylke, foredla av Albert Idsøe
I Ryfylke har bøndene lang og stolt tradisjon med å senda sauene på eit frodig og rikt fjellbeite om sommaren. I alt 29 produsentar står bak Fjellam frå Ryfylke, og har produsert lam med strenge kriterium til kvalitet og opphav. Dette kjøtet har Albert Idsøe foredla, og er finalist med Fjellam frå Ryfylke sitt kaldrøykte pinnekjøtt i kategorien Årets kjøtt foredla. Pinnekjøttet er tørrsalta og kaldrøykt i dei tradisjonsrike lokala til A. Idsøe i Stavanger.
Enkel og rein ryfylkeyoghurt
Hilde og Joar Hauge driv garden Ryfylke gardsysteri i Hetlandsbygda på Fister. Garden overtok dei for 14 år sidan, og det nye fjøset og ysteriet stod ferdig i 2020. Her produserer dei både halvfast kvitost og ryfylkeyoghurt. Deira ryfylkeyoghurt naturell er finalist i kategorien Årets meieriprodukt.
– Det er utroleg kjekt at me er i finalen, seier Hilde. Me er veldig ferske i gamet, og set stor pris på at vår «enkle og reine» yoghurt naturell er blant finalistane.
Finalen blir sendt direkte på Matkanalen torsdag 3. februar kl 19:30.