Snart kjem dampen …

apr 6, 2021 | Framside, Nyhende, Ryfylkealliansen

Rødne sin nye ambulansebåt er ikkje langt unna Ryfylkebassenget. Nyleg sjøsett, namn med snert og utstyrt som brannbåt i tillegg. Ikkje rart det er forventingar til Ryfylke sin nye livreddar.

Lars Rødne bestiller bort imot ein ny båt i året frå Brødrene Aa i Hyen på nordvestlandet.
– Ja, det er ikkje langt unna. Rygerdronningen, Rygerelektra og nå denne nye ambulansebåten, smiler ein tilfreds dagleg leiar i reiarlaget Rødne.
Sjernarøyselskapet skal andre mai setja Rygermedic inn i drift i Ryfylkefjordane. Rygermedic skal erstatta Rygerdoktoren, som trufast har tent folk i Ryfylke i årevis. Mannskapet om bord har redda liv, tatt imot nyfødde og fått pasientar trygt til sjukehuset i Stavanger.
– Det å driva ambulansebåt er utan tvil meiningsfylt. Og nå får me ein endå betre båt, som kan respondera raskt på kritiske oppdrag og dekkja store avstandar på kort tid, understrekar Lars Rødne.

Lege- og brannbåt
Rygermedic er 22 meter lang, har ein toppfart på 35 knop og er også bygd for å kunna sløkkja brannar.
– Ja, Rygermedic er utan tvil eit løft for branntryggleiken langs kystlinja i Ryfylke. Båten er ikkje ein komplett brannbåt, men kan starta sløkkjearbeidet raskt. Me har ei brannpumpe på dekk, som kan vera til stor nytte når det brenn, forklarer Lars Rødne og legg til:
– Brannpumpa kan også nyttast som lensepumpe. Me har ein liknande båt i Austevoll, og pumpa på denne legebåten har redda fleire båtar frå å søkkja.
Rødne har drive ambulansebåt i Ryfylke i fleire tiår. Helse Stavanger er oppdragsgjevar, og avtalen er at Rygermedic skal vera «skjærgardsdoktor» fram til 2027, med mogleg for ytterlegare forlenging i fire år.

Likar namnet
Reiarlaget Rødne tar nå imot nybygg nummer 21 i rekkja frå Brødrene Aa i Hyen. Me snakkar om eit samarbeid gjennom 50 år.
– Brødrene Aa er den klart beste båtbyggjaren i verda. Dei leverer alltid, både på kvalitet og innan tidsfristane. Båten blei sjøsett ved Brødrene Aa sitt nye anlegg i Eikefjord før påske, og Rygermedic verkar som han skal. Det er berre å sjå fram til båten sin første dag på jobb, andre mai, slår Lars Rødne fast.
Selskapet har nok ein gong skapt engasjement når val av namn skulle fattast. Folk flest blei inviterte til å foreslå namn, og det var ikkje mindre enn 140 ulike namneforslag. I avstemminga var Rygermedic ein klar favoritt, med Rygerhjelpen på andre plass.
– Namnet er bra. Det er dekkande og sjølvforklarande. At namnet er engelsk er ikkje problematisk. Alle veit kva ordet «medic» betyr, sa Lars Rødne til lokalavisa Øyposten, då namnevalet var gjort i februar.
– Eg likar namnet betre og betre. Og eg kan nesten ikkje venta med å sjå Rygermedic her kor den høyrer heime, som livreddar og medhjelpar i Ryfylkefjordane, avsluttar Lars Rødne.

Foto: Sølve Helge Knutsen

Arkiv

Relaterte innlegg

#ryfylkepuls – Bli med i vår fotokonkurranse!

#ryfylkepuls – Bli med i vår fotokonkurranse!

Skal du oppleva Ryfylke i sommar? Legg ut ditt Ryfylke-bilete på sosiale medium og du kan vinna vår tøffe Ryfylkepuls t-skjorte! Korleis deltek eg? Å delta i konkurransen er lett som berre det! Knips eit bilete i Ryfylke.Post bilete på Facebook eller Instagram og tagg...

NYT RYFYLKE I SOMMAR

NYT RYFYLKE I SOMMAR

Har du verkeleg opplevd Ryfylke? Gått dei lange turane, eller dei korte stubbane? Smakt på maten vår, kjent stilla? Eller kva med drønnet frå fossen, kafeen i sentrum eller soloppgangen til fjells? Fiskelukka på sjøen eller rett og slett berre late utsikten ta pusten...

Solid fundament frå Forsand

Solid fundament frå Forsand

Sykkelvelodrom på Sola, idrettshall på Jørpeland og element til infrastruktur. Variasjonen er stor og det er full gass ved Norsk Spennbetong på Forsand. Og ein kamp for å få nok arbeidsfolk inn. 150 millionar kroner i omsetting kvart år. Ja, du las rett....

Pin It on Pinterest

Share This