Snørike ryfylkefjell gjev billig straum

mai 13, 2020 | Framside, Nyhende, Ryfylkealliansen

Store snømengder dei siste to månadene, gav ikkje mange skigleder for den store folkehopen. Det sørga Mister Korona for. Men, ryfylkingen kan i alle fall gleda seg over at snøen har gjeve rekordlåge straumprisar.

– Straumen kjem nok til å vera billig gjennom heile sommaren, slår administrerande direktør Svein Ilstad i Saudefaldene fast. Han har verkeleg kunne gje mange straumkundar gode nyhende dei siste månadene:
– I april var snittprisen litt over fem øre per kilowatt time. Det er heftig billig og ikkje noko me opplever ofte, fortel Svein Ilstad og ser opp mot snørike fjelltoppar i Sauda.

Nok straum – lite forteneste
Saudefaldene har ei historie som går tilbake til 1913, då verksemda blei etablert for å skapa vatn i Saudafjella om til elektrisitet. Først og fremst var det eit planlagt smelteverk som trengte mykje straum. I dag er det meir enn smelteverket Eramet Norway Sauda som har gleda av straumen som Saudefaldene produserer. Gjennom eit nettverk av demningar, røyrleidningar, kraftstasjonar og tunnelar får delar av Ryfylke og Haugalandet gleda av «Saudastraum». Saudefaldene er ein vesentleg kraftprodusent i Norge.
– Det er lett å selja kraft i desse dagar, men dårleg betalt. Me snakkar om 10-20 % av prisen me er vane med, forklarar Svein Ilstad, som ikkje mister nattesvevnen av den grunn.
Saudefaldene har økonomiske musklar til å klara seg.
– Men, me opplever sterkt reduserte resultat grunna eit solid kraftoverskot i den norske marknaden og vesentleg lågare kraftprisar enn tidlegare år. Det er nok fleire i kraftbransjen som diverre slit litt no, til dømes nybygde småkraftverk. For nå er det ikkje lett å tena pengar på kraftproduksjon, meiner Ilstad.

Snø og vindkraft
Heile Norden fekk mykje snø frå januar og utover vinteren. Ein merka det ikkje så mykje i låglandet, grunna høge temperaturar, men høgt i fjella har snøen bygd seg opp gjennom heile vinteren. Dette er snø som vil fylla kraftmagasina godt og lenge ut over våren og sommaren. Det er framleis mykje som skal smeltast i vekevis.
– Forventa forbruk er også gått ned desse månadene, grunna korona. Så det er ingen tvil om at straumkunden har ein opptur i desse dagar, seier Svein Ilstad og legg til:
– Vindkrafta gjer også sitt til at me har overskot av kraft. Både i Norge, Sverige og Danmark har vindmølleparkane gjort sitt inntog, og det ser me også på tala for dei første månadene i 2020.
Kraftprodusent «Ilstad» er også ein ihuga skientusiast. Det er blitt svært så avgrensa med tid i Sauda Skisenter, grunna koronarestriksjonar. Men, han gler seg likevel over godt med snø i fjella.
– Eg tenkjer eg er heldig som bur i Ryfylke og kan nyta dei fine fjella så nært kvardagen min. Eg har fått mange flotte skiturar i vinter, både i helgar, i vekene, i lys og mørke. Den siste månaden har det vore eit dilemma: Ski eller golf? Heldigvis er det blitt tid til begge delar. Og så får eg gleda meg på vegner av kundane som sparar pengar på at me i Saudefaldene har så mykje snø og tæra på i månadene som kjem, smiler Svein Ilstad.

Denne filmen frå AS Forskaling viser kor mykje snø det er i Saudaheia nå!

Arkiv

Relaterte innlegg

Optimisten trur på opptur

Optimisten trur på opptur

- Akkurat nå sit eg på gjerdet og ventar på at det losnar. Då trur eg det blir ein bra sommar, seier Kai Risa på Rennesøy. Han er klar for aktivitet og bubilar.Kai Risa har styrt Sjøberg Ferie i over halvparten av dei 21 åra verksemda har eksistert. I sjøkanten på...

Kva veit du om Ryfylke?

Kva veit du om Ryfylke?

Quiz deg til flotte premiar frå Ryfylke! Kvart år kjempar 8.klassingane i Ryfylke i den store Ryfylkequizen. Ryfylkealliansen reiser rundt til dei ulike ungdomsskulane i Ryfylke med mål om å læra 8. klassingane om Ryfylke. 8.klassingane får også eit innhaldsrikt...

Vel verd å feira eittåring

Vel verd å feira eittåring

Med bakvarer, komler, varme smil og nystrokne t-skjorter feira Ryfylke Bakeri og Konditori eit år i nye lokale på Tau. Og folk blei med på festen.- Det har vore ein kjekk, travel dag. Ja, godt med folk frå morgon til kveld, og meir gjestar og pengar i kassen enn ved...

Pin It on Pinterest

Share This