Solid fundament frå Forsand

jun 18, 2021 | Framside, Nyhende, Ryfylkealliansen

Sykkelvelodrom på Sola, idrettshall på Jørpeland og element til infrastruktur. Variasjonen er stor og det er full gass ved Norsk Spennbetong på Forsand. Og ein kamp for å få nok arbeidsfolk inn.

150 millionar kroner i omsetting kvart år. Ja, du las rett. 150 000 000 kroner. Det er ikkje småtteri ein held på med ved Myra industriområde på Forsand.
– Det er som eit lite eventyr ja. Og det er utruleg mykje å gjera, forklarer Bård Hansen i Norsk Spennbetong.
Han kan sjå at fabrikken går for fullt. Nye prefabrikkerte betongelement skal gjerast klare, for så og fraktast over Lysefjordbrua og ut i Ryfylke, Rogaland og Norge med.
– Me leverer for alle typar bygg og anlegg. Vår spesialitet er større forspente brubjelkar, fortel Bård Hansen.
Noko av det tøffaste dei har laga er nettopp slike brubjelkar i betong, som blei lagt over motorvegen inn til Stavanger, som ein del av Ryfastutbygginga. Der er det blitt ein flott miljøkulvert, som er blitt ein park og eit populært turområde ved Mosvatnet.
– Det er nok ikkje alle som tenkjer på at me har lagt fundamentet for noko så fint, ler Bård Hansen.

Sportsleg og begeistra
I desse dagar blir eit anna nasjonalt ikon bygd på Sola. Som ein del av dei såkalla Folkehallane, står snart Sola Arena klar. Folkehallane er eit interkommunalt samarbeid mellom Stavanger, Sandnes og Randaberg. Frå før er Sørmarka Arena (skeiser), Sandneshallen (friidrett) og Randaberg Arena (fotballhall) bygd.
– Nå har me i Norsk Spennbetong lagt betongelement for den fantastiske innandørs sykkelvelodromen på Sola. Me snakkar om den første i Norge, ein 250 meters bane etter internasjonale mål. I tillegg blir det turnhall og speleflate for handball og andre idrettar, seier Bård Hansen.

Nye fleirbrukshallen på Jørpeland opnar i sommar.
Sykkelvelodromen, med turnhall og speleflate for idrettar i sentrum, i Sola Arena.

– Stolt?
– Det er jo berre fornamnet. Det er rett og slett kjempegøy å ha vore med å bygd noko som er så spesielt og det første i sitt slag i landet.
– Men, det er ikkje småtteri det som blir opna på Jørpeland heller?
– Nei, den nye fleirbrukshallen blir verkeleg flott. Den opnar nå i sommar. Og ja, me leverte elementa til den hallen også. Det er viktig at me er synlege i Ryfylke og nærmiljøet, konstaterer Bård Hansen.

Karanteneutfordringar
Arbeidsstokken er ein herleg miks av ryfylkingar og arbeidsinnvandrarar. Som resten av bygg- og anleggsbransjen er også Norsk Spennbetong avhengige av arbeidsimport.
– Me er om lag 75 tilsette, og ja mange er dyktige folk frå spesielt aust-europeiske land. Me hadde ein veldig bra start på 2021. Då koronarestriksjonane blei stramma inn ytterlegare, blei det vanskeleg å få tak i nok folk, erkjenner Bård Hansen.
Det er innreisereglane som, naturleg nok, er blitt utfordringa. Tilgang på arbeid har derimot ikkje vore eit problem.
– Det går jo mot lysare tider nå, på alle måtar. Og me trur 2021 alt i alt blir eit bra år, også med tanke på å få nok folk til å gjera jobbane. Men, det er klart, det er ikkje kjekt å liggja på etterskot med arbeidet. For me vil jo halda planen, avrundar Bård Hansen og sender ut nye betongelement frå fabrikken på Forsand.

Arkiv

Relaterte innlegg

Merkevareprisen 2021 til Helgøy Skyssbåt AS

Merkevareprisen 2021 til Helgøy Skyssbåt AS

Ryfylkealliansen deler kvart år ut Merkevareprisen Ryfylke til ei verksemd som har utmerka seg ved å bidra til å løfta Ryfylke opp og fram. Prisen blei delt ut på Arena Ryfylke på Hjelmeland. For 14. gong blir Merkevareprisen Ryfylke delt ut. Merkevareprisen skal gå...

Verdsklasse i Hjelmeland

Verdsklasse i Hjelmeland

Episode fire av Ryfylkepuls er på lufta. Bli med til Hjelmeland der ein med rette kan skryta på seg å vera i toppen i verda. Røykelaks, sider og jærstol – best og størst. Og verdas første hydrogenferje går nettopp i Hjelmelandssambandet. Nå blir det også satsa på...

Pilt-Ola prisen 2021 til Gunvor Fiskå

Pilt-Ola prisen 2021 til Gunvor Fiskå

Ho er samfunnsengasjert, og har alltid vore oppteken av å få ungdom i arbeid og brenn for faget sitt. Gunvor Fiskå frå Jørpeland er tildelt den gjeve Ryfylke-utmerkinga Pilt-Ola prisen. Fylkesordførar Marianne Chesak delte ut prisen under Arena Ryfylke på Hjelmeland...

Pin It on Pinterest

Share This