Tina takkar for seg

okt 5, 2020 | Framside, Nyhende, Ryfylkealliansen

30. september hadde Tina Cosette Asbjørnsen siste dag på jobb ved Ryfylke Fjordhotell. Etter 24 år som eigarar av hotellet på Sand, takkar nå ho og ektemannen Erling for seg.

– Det skal bli rart å stå opp og ikkje skal gå ned her på hotellet. Eg har jo meir eller mindre budd her i nesten 25 år. Tenk nå kan eg skru av mobilen, og ikkje vera brannvakt 24/7, smiler Tina på sin siste arbeidsdag.
Erling hadde siste arbeidsdagen for ein månad sidan. Nå er det altså Tina som skal seia far vel til trufaste medarbeidarar og eit lokalsamfunn ho har tent i eit kvart hundreår. Ryfylke Fjordhotel har vore i framsete når det gjeld turisme og overnatting i Ryfylke i årevis. Tina og Erling er blitt ein levande institusjon på Sand. Ja, hotellet har hatt sin del av æra for at hovudstaden i Suldal er blitt den perla den er.

Vemodig og godt
Tina innrømmer at det er ein smule vemodig å takka av. Det er jo trass alt eit livsverk dei tar avskjed med, eit hotell dei sjølve har bygd opp.
– Men, det skal bli herleg å sleppa ansvaret. Det at du alltid skulle vera tilgjengeleg. Nå får eg ein heilt annan fridom, slår ho fast.
Samtidig er det godt å vita at hotellet skal drivast for fullt vidare. Norwegian Experience har kjøpt hotellet. Det er same eigarar som driv Preikestolen Fjellstove og Lilland Hotel i Strand.
– Per Kristian Djuvsland overtar som direktør her. Ein utruleg likandes kar, som jo styrer Lilland i dag, skryt Tina Cosette Asbjørnsen.
Ho er glad ho overlét hotellet i god stand, også økonomisk. Sommaren 2020 var også storarta.

Flyttar på seg
Farvel med hotellet er også farvel med Sand, bygda ekteparet Asbjørnsen har budd i dei siste 34 åra.
– Me flyttar nærare familien. Begge barna våre med sine familiar bur i Stavanger og Sandnes. Me har kjøpt oss bustad på Åsen i Stavanger, forklarar Tina.
Ho forsikrar at det ikkje har noko med mistrivnad på Sand å gjera.
– Men, om me hadde blitt buande her, ville alle kommentert undervegs kva dei meinte om hotellet. Det skal dei sleppa.
Erling er blitt pensjonist. Tina Cosette ventar litt med å pensjonera seg.
– Eg kjem til å jobba litt freelance i nokre butikkar. Rydda på lager og vera vaktmeister. Eg skal vera i bakgrunnen. Eg har stått nok framme nå, smiler Tina Cosette Asbjørnsen, som leverer nøklane til Ryfylke Fjordhotel frå seg og takkar av.

Arkiv

Relaterte innlegg

Optimist etter heftig år

Optimist etter heftig år

Sverige-køyring og fotballreiser har vore kjærkomne for Suldalsbussen, i eit tøft 2020. Men, mentale utfordringar har vore vel så heftige som økonomiske bekymringar.- Når du enkelte månader har 80 prosent svikt i omsetnaden, blir det blodraude tal totalt sett. Per...

Korona veltar truleg busslasset

Korona veltar truleg busslasset

Koronakrisa har sendt Finnøy Buss på randen av konkurs. Men, Bjørn Arvid Joakimsen har likevel ikkje mista lysten på å driva busselskap.- Eg er redd me må kasta inn handkledet.Bjørn Arvid Joakimsen er ærleg. Denne veka kan det bli kroken på døra for Finnøy Buss,...

Hytteboom i Ryfylke

Hytteboom i Ryfylke

Hyttene går unna i Ryfylke. Ryfasteffekten er merkbar og 2020 blei eit godt år for tilbydarane. Nå er forventinga at det blir endå større rift om hustomtene. - Me blei utseld for hyttetomter i fjor. Men, fortvil ikkje. Me har fleire nye tomter klare innan kort tid....

Pin It on Pinterest

Share This