Engasjement, stoltheit, framtidstru og ein del spenning. Det svevar optimisme og forventing i lufta. Mange unge i Ryfylke har planane klare for framtida. Men, valet er ikkje lett. Den nyaste sendinga av Ryfylkepuls er definitivt opptatt av kva tankar ungdomen har om skule- og yrkesval. Det er litt av ein gjeng me møter i sendinga. Mikhail og Ådne går den såkalla YSK-linja ved Sauda vidaregåande skule. Men, kva er YSK og er det ikkje lenge med fire år på skulebenken? Ei herleg blanding av praksis og teori, understrekar karane.
Oliwia og Simone går på Strand vidaregåande skule, og har yrkesplanane klare. Dei går på typisk gutelinjer, men elskar sveising og automasjon. Dessutan møter me ein flokk av ungdomsskuleelevar frå heile Ryfylke, som skal ta viktige vidaregåande skuleval i nær framtid. Og dei yngste på ungdomsskulen er klare for quiz. For nå er Ryfylkequizen for åttande klassingar i gang, og du kan bli med oss på turné. Ryfylkepuls dunkar i ungdommeleg tempo og me vonar du vil sjå sendinga vår.