Våren er komen – tomatane er her!

apr 15, 2021 | Framside, Nyhende, Ryfylkealliansen

Endeleg er tomatane her igjen. Sist veke var tomatane frå Lauvsnes Gartneri på Finnøy tilbake i butikkhyllene. Og tomatgartnaren sjølv kan aldri få nok av nye investeringar og justeringar.

– Er dei ikkje gode vel?
Jan Terje Vignes hiv inn på nok ein tomat, med kjærleik i blikket.
– Tomatsorten heiter Romanse, så det passar godt, ler tomatgartnaren frå Finnøy i Ryfylke.
Jan Terje Vignes blir 40 år til sommaren, og har drive som tomatbonde på Lauvsnes sidan han var 18. Alltid på jakt etter noko nytt. Romanse er nytt av året, i tillegg til nye investeringar til ei meir effektiv pakkelinje.
– Ja, det er alltid noko nytt på gang. Men, eg likar det slik. Dei som jobbar her skal ha ein litt enklare kvardag, produksjonen skal sviva litt betre for kvart år, ja det er små nyansar som gjer at me blir litt betre, fortel Jan Terje Vignes.

Nytt av året i Lauvsnes Gartneri er denne tomatypen; Romanse.

Smått og stort
Han har bygd trinn for trinn med drivhus sidan år 2000. Starta med tre mål, nå er det tretti mål med drivhus. Godt og vel 850 tonn med tomatar av sortane Romanse og Juanitas skal ut til forbrukaren dette året. Søte, små smaksbomber. Og så dei store då.
– Me har ein avtale med Dyreparken i Kristiansand om å levera bifftomatar. Desse blir brukt på hamburgarane som parken serverer om sommaren. Det er ikkje der me tener pengane våre. Men, det er ein kjekk gimmick å levera tomatar til Norges største serveringsstad, påpeikar Jan Terje Vignes.
Han er vane med å tenkja store tankar. Nå er planane større enn størst. I løpet av 2021 skal Lauvsnes Gartneri investera stort, med god hjelp av Enova.
– Me snakkar om borti 50 millionar kroner .
– Såpass? Kva skal skje?
– Det er eit stort miljøprosjekt. Me blir først i verda med ei utruleg spennande løysing. Berre følg med, smiler Jan Terje Vignes lurt og stolt.

– Nå er det kjekt at me går mot lysare tider, og at tomatane er her igjen

Berg- og dalbane
Livet som tomatgartnar har vore som ein heisatur. Det er store oppturar og heftige nedturar. Solid inntening når det går etter planen, store slag i trynet når alle tomatplantane er blitt sjuke og må sanerast.
I fleire år har Lauvsnes Gartneri hatt heilårsproduksjon. Då har plantane vore sett ut i gartneriet i ulike syklusar. I vinter blei det derimot ein pause.
– Denne vinteren skifta me ut alle plantane på ein gong. Dette førte til at det var to månader med berre plantestell og inga hausting, forklarer Jan Terje.
– Korleis var det å hausta dei første tomatane igjen?
– Eg innrømmer at det har vore litt herleg å ha dei to månadene fri. Vel, fri og fri. Me har jo vore i drift på anlegget. Men, det er rart med det, når dei første tomatane er hausta så går du inn ein modus. Det er 24/7. Fullt fokus på gode tomatar. Eg trur vinteren har gjort meg godt, slår Jan Terje Vignes fast.
– Skulle du hatt ein lenger vinter?
– Å nei. Nå er det kjekt at me går mot lysare tider, og at tomatane er her igjen. Er dei ikkje gode vel?

Lauvsnes Gartneri er blitt kjent for desse søte små Juanitastomatane.

Og medan du er på veg til butikken for å kjøpa deg Juanitas eller Romanse, så kan du jo lytta til remixen av Lauvsnes Gartneri sin eigen tomatsong. Den er nesten like god som tomatane.Tomatsangen Remix! | Lauvsnes Gartneri (lgartneri.no)

Arkiv

Relaterte innlegg

Optimisten trur på opptur

Optimisten trur på opptur

- Akkurat nå sit eg på gjerdet og ventar på at det losnar. Då trur eg det blir ein bra sommar, seier Kai Risa på Rennesøy. Han er klar for aktivitet og bubilar.Kai Risa har styrt Sjøberg Ferie i over halvparten av dei 21 åra verksemda har eksistert. I sjøkanten på...

Kva veit du om Ryfylke?

Kva veit du om Ryfylke?

Quiz deg til flotte premiar frå Ryfylke! Kvart år kjempar 8.klassingane i Ryfylke i den store Ryfylkequizen. Ryfylkealliansen reiser rundt til dei ulike ungdomsskulane i Ryfylke med mål om å læra 8. klassingane om Ryfylke. 8.klassingane får også eit innhaldsrikt...

Vel verd å feira eittåring

Vel verd å feira eittåring

Med bakvarer, komler, varme smil og nystrokne t-skjorter feira Ryfylke Bakeri og Konditori eit år i nye lokale på Tau. Og folk blei med på festen.- Det har vore ein kjekk, travel dag. Ja, godt med folk frå morgon til kveld, og meir gjestar og pengar i kassen enn ved...

Pin It on Pinterest

Share This