Vårgnist i Bergekrossen

mar 26, 2020 | Framside, Nyhende, Ryfylkealliansen

– Det er viktig å dra fram alt som er positivt for tida. Og her hjå oss er det ein veldig god tone, seier Leif Bakka i Møgedal Mek. Verkstad. Han ser at våren gjer ryfylkingen godt, og handlar deretter.

Permitteringar, stengte forretningar og kundesvikt. Du høyrer og les om det kvar dag i desse tøffe koronatider. Ryfylke er også sterkt prega av situasjonen. Då er det fint med gode nyhende.
– Her sel og reparerer me jamt og trutt til bonden og til dei som skal putla i hus og hage, smiler ein godt nøgd Leif Bakka. Han er dagleg leiar i Møgedal Mekaniske Verkstad, som ligg i Bergekrossen to kilometer ovanfor Sand sentrum i Suldal.
Den tradisjonsrike landbruksforhandlaren med sju tilsette har meir enn nok å halda fingrane i.
– Med våren følgjer ein aktiv periode for bonden, og då må maskinar vera på plass og i orden. Og kanskje er det slik at koronautbrotet har gjort at folk har meir tid til å rota i hagane og halda på der, funderer Leif Bakka.

Optimisme
Leif Bakka er ein nøktern type, som ikkje tar av i aust og vest. Men, han meiner det er viktig å melda frå om det som går godt.
– Me hadde trudd det skulle bli meir bom stopp hjå oss då me høyrde om verksemder som stengte dørene og permitterte. Men, me har god ordrereserve på verkstaden og har god aktivitet på salssida, fortel Bakka.
Sjølv er han ivrig medspelar i Sandsgruppa, eit nettverk av bedrifter som held til frå Sand sentrum og opp til Bergekrossen. Han erkjenner at det har vore tøffe veker for fleire av verksemdene.
– Men, då me hadde telefonmøte onsdag i denne veka, spora eg ein meir optimistisk tone frå fleire. Fleire av butikkane hadde opplevd at talet på kundar auka noko. Derfor er det så viktig at me har fokus på at folk må få augo opp og handla lokalt, påpeikar leiaren for Møgedal Mek. Verkstad.

Skjerpa rutinar
Hans store skrekk er om ein av dei sju tilsette no skulle bli smitta av koronaviruset. Det vil få konsekvensar for drifta. Dei tilsette har innført strenge interne restriksjonar.
– Me har splitta oss når me har pausar. Så då et ikkje alle i lag, og me har to meters avstand til kvarandre. Me reingjer flater og tastatur jamleg og forklarar kundane som kjem tydeleg om kva rutinar som gjeld. Og nå får ingen kundar koma inn i verkstaden. Nå kjem mekanikaren ut i butikken og talar med kunden i staden, forklarar Leif Bakka.
Køyretøy og anna utstyr som skal leverast til kundane blir også grundig vaska og desinfisert før utkøyring frå Bergekrossen. Møgedal Mekaniske Verkstad møter våren reine som aldri før.
– Ja, me veit at det blir ein annleis påske, utan besøk av hyttefolket. Men, på den andre sida reiser ingen frå Suldal vekk heller. Så då treng det ikkje bli så gale, heller ikkje for oss som driv her i Bergekrossen, slår ein høveleg optimistisk Leif Bakka fast.

Arkiv

Relaterte innlegg

Her er finalelaga

Her er finalelaga

Skulefinalane i Ryfylkequizen er utført, med spenning, engasjement og tårer. Me står att med 27 motiverte ungdomar, som skal til den store direktesende finalen i mai. Åttandeklassingar i heile Ryfylke har gjort ein iherdig innsats og tileigna seg mykje kunnskap om...

Ungdom i Ryfylke får gratis ungdomskort frå 1.april

Ungdom i Ryfylke får gratis ungdomskort frå 1.april

Ryfylkepuls har tatt pulsen blant Ryfylkeungdomen – kva synes dei om ordninga med gratis ungdomskort som snart skal tre i kraft? Vil det gjera at dei reiser meir? Er dette eit godt lokkemiddel for å få ungdom til å bu og studera i Ryfylke? Ein av dei me tok ein prat...

Søknadsfristen nærmar seg!

Søknadsfristen nærmar seg!

1.mars er fristen for å søkja om plass ved dei vidaregåande skulane, og i Ryfylke har me to av desse.  Strand vgs er ein skule som ligg sentralt på Tau i Strand kommune. Med visjonen "Det beste i den enkelte" er tilsette ved Strand vgs opptatt av og bevisste på å sjå...

Pin It on Pinterest

Share This