Konstituerande møte for ungdomsstyret i Ryfylke finn stad i Stavanger fredag 7.juni. Styret skal vera ein fellesarena for ungdomsrådene i Ryfylke i saker som handlar om å vera ung i regionen.
– Styret skal vera ein viktig pådrivar for å auka deltaking av unge i utviklinga av Ryfylkeregionen. Det skal bidra til å byggja gode møteplassar og å styrkja bu- og arbeidsattraktivitet for unge i regionen, seier rådsordførar Irene Heng Lauvsnes.
Ungdomsstyret i Ryfylke har ti medlemmer, to frå kvar av Ryfylke-kommunane Sauda, Suldal, Hjelmeland, Strand og Sandnes. Gjennom samarbeid over kommunegrensene skal medlemmene i ungdomsstyret dra nytte av kvarandre sine erfaringar frå dei ulike kommunane, med sikte på utvikla og styrkja regionen.
– Styret skal arbeida for at ungdommar kan stå saman i viktige interessesaker som gjeld unge sine vilkår i Ryfylke, og det skal ha eit sentralt ansvar for å bidra til å byggja Ryfylke-identiteten i regionen, seier Lauvsnes.
Oppgåvene til ungdomsstyret i Ryfylke
Saman med ungdomsråda i kommunane skal styret stimulera til samfunnsengasjement, medbestemming og deltaking når politikk skal formast.
Viktige oppgåver til ungdomsstyret blir å:
- leggja til rette for faglege og sosiale arenaer og møteplassar for dei unge
- peika ut representantar til politiske fora på regionalt og fylkeskommunalt nivå som skal representera unge i Ryfylke
- arbeida for at kollektivtilbodet i regionen tar omsyn til ungdommen sine behov
- bidra til å fordela midlar til tiltak av interesse for unge
- vera eit høyringsorgan i alle saker som gjeld dei unge sine vilkår
Ungdomsstyret kan også invitera politikarar, administrasjon eller andre til styremøta for utveksling av informasjon og kunnskap, for å stilla spørsmål eller for å diskutera ei sak.
Samansetjing av styret
– Kvart ungdomsråd i Ryfylke-kommunane vel ein representant med vara til ungdomsstyret. Representanten må vera mellom 15 og 20 år i kalenderåret han blir vald. Ryfylkerådet peikar i tillegg ut ein person med vara frå kvar kommune som er over 20 år og under 26 år i kalenderåret vedkomande blir vald. Funksjonstida for styret er to år, med 5-6 årlege møter, avsluttar Lauvsnes.
Les meir om ungdomsstyret i Ryfylke
Rapport: Tilrådingar frå ungdomsutvalet
Nyheiter frå Ryfylke IKS
- Ledige studieplassar på grønt mangesysleri og entreprenørskap
- Etablering av ungdomsstyre i Ryfylke
- Kven meiner du fortener MOR-prisen for 2024?
- Velkommen til den nye nettsida vår!
- Kunstig intelligens og attraktivitet er tema på MOR-konferansen 2024
The post Etablering av ungdomsstyre i Ryfylke appeared first on RIKS – Ryfylke IKS.
